लगभग २२ वटा नेपाली फिल्ममा सहायक भएर निर्देशन गरेका ऋषि लामिछाने ‘कही मिलन कही विछोड’ बाट फिचर फिल्मको निर्देशनमा डेव्यु गरेका हुन् । डकुमेन्ट्री तथा टेलिफिल्म गरी पाँच सय बढी निर्देशन गरेका ऋषि निर्देशित धारावाहिक टेलिफिल्म ‘परिचय’ गृहस्थी दर्शक माझ हिट थियो । व्यावसायिक रुपमा सफल फिल्म ‘आफ्नो मान्छे आफ्नै हुन्छ’ सहित उनी निर्देशित ‘श्रीमान श्रीमती’, ‘हाम्रो माया जुनी जुनीलाई’ र ‘सरी ल’ फिल्महरु प्रदर्शनमा आइसकेका छन् । ऋषि लामिछाने निर्देशित पछिल्लो फिल्म ‘हवल्दार सुन्तली’ आउँदो शुक्रबार चैत २७ गते बाट सार्वजनिक प्रदर्शनमा आउँदैछ । निर्देशक लामिछानेका हरेक जसो फिल्म नारी संवेदनासँग जोडिएका हुन्छन् । निर्देशक ऋषि लामिछानेसँग न्यूजपेजथ्री डटकमका लागि उत्सव रसाइलीले संवाद गरेका छन्, जसलाई यहाँ प्रस्तुत गरिएको छ । 

तपाइका अधिकाशं जसो फिल्म तथा टेलिफिल्म नारी संवेदनासँग जोडिएका हुन्छन्,किन ? 

ईश्वरले बनाएको सबैभन्दा सुन्दर श्रृष्टि भनेकै नारी हो । नारीमा त्याग र सर्मपण हुन्छ । सुखमा नआत्तिने र दुःखमा नमात्तिने बानी नारी जातिमा हुन्छ । स्वर्णिम, सफल र सवल भनेकै नै नारी हुन् । नारी जननी देखि साथ दिने र सबैभन्दा अमुल्य उपहार भनेकै नारी हुन् । म नारीलाई पूजा गर्छु । त्यसैले म टेलिफिल्ममा या फिल्ममा नारी संवेदनाका विषय उठाउँछु ।

दर्शकको संवेदना ‘क्यास’ गर्न सजिलो हुन्छ भनेर त नारी संवेदनालाई जोड दिनु भैरहेको होइन ? 

दर्शकको मनोभावनालाई क्यास गर्ने भन्ने त्यो चाहिं व्यावसायिक पक्ष होला । निर्देशकले दर्शकको भावना ‘क्यास’ गर्छु भन्न मिल्दैन । तर, नारी संवेदनाले दर्शकको मनसम्म पुगेर छुन्छ भन्ने विचार चाहि हो ।

फिल्म ‘हवल्दार सुन्तली’ पनि नारी संवेदना माथि नै आधारित फिल्म हो क्यारे ? 

‘हवल्दार सुन्तली’ महिला हिंसा विरुद्धको आवज हो । यो फिल्म सत्य घटनामा आधारित हो तर हामीले सुन्तली धामीको घटनालाई क्यास गर्न खोजेका भने होइनौं । यदि त्यस्तो गर्ने भए सुन्तली धामीको वृत्तचित्र बनाउँथ्यौं वा जीवनीमा फिल्म बनाउँथ्यौं । यो फिल्म सुन्तली धामीको जिवनकथा होइन । हामीले उनी माथि घटेको त्यो घटनालाई ‘इष्यू’ मात्रै बनाएका हौं । सुन्तली धामीको घटनामाथि घटेको घटनापछि उन्को जिवन कसरी चल्या ? हाम्रो पात्रले त्यसलाई प्रस्तुत गर्दछ । 

वास्तविक घटनालाई कसरी फिल्ममा प्रस्तुत गर्नु भएको छ त ? 

घटनालाई काल्पनिक बनाएका छैनौं । घटना पछिका कुराहरुलाई हामीले आफ्नै तरिकाले प्रस्तुत गरेका छौं । यथार्थको नजिक रहेर कल्पनालई प्रयोग गरिएको हो ।

उसो भए ‘हवल्दार सुन्तली’ मा के छ त ? 

अहिले छ सात वर्षको बालिकामाथि पनि बलात्कार भएको घटना सार्वजनिक भैरहेका छन् । यस्ता घटनालाई पनि हामीले फिल्ममा समावेश गरेका छौं । मानविय जिवनमा घट्ने घटनाक्रमको चक्र नै ‘हवल्दार सुन्तली’ हो । सुन्तली धामी प्रतिनिधि पात्र मात्रै हुन् । मान्छेको जिवनमा आइपर्ने सुख, दुःख, रिस, आवेग सबै कुरालाई हामीले फिल्ममा समावेश गरेका छौं । ‘हवल्दार सुन्तली’ डेढ करोड नेपाली महिलाहरुको लागि बनाइएको फिल्म हो । यो फिल्म हेरेर महिला दिदी बहिनीलाई समाजमा गलत काम गर्ने पुरुषलाई पराजय गर्ने प्रेरणा मिल्छ । 

पुरुष पात्रलाई चाहिं फिल्ममा कुन स्थान दिनु भएको छ नि ?

सुन्तलीको जिवनमा घटेको घटना माथि सहयोग गर्न आउने भूमिकामा दुई जना नायक (किशोर खतिवडा र सविन श्रेष्ठ) प्रस्तुत भएका छन् । सुन्तलीको दुःख र सुखमा दुई जना पुरुष पात्रले सहयोग गर्छन् । सुन्तलीको जिवनमा आउने आरोह र अवरोहमा साथ दिन दुइ जना नायक आइपुग्छन् । 

‘हवल्दार सुन्तली’ अर्थात् नायिका शिल्पा पोखरेल लाई कत्तिको खरो रुपमा प्रस्तुत गर्नु भएको छ ? 

‘लज्जा’ फिल्म हेरेपछि मैंले शिल्पालाई ‘हवल्दार सुन्तली’ खेल्ने प्रस्ताव गरेको थिएँ । मैंले जे सोचेको थिए, जुन अपेक्षा गरेको थिएँ शिल्पाले त्यो भन्दा राम्रो अभिनय गरेकी छन् । द्धन्द्ध, नृत्य, अभिनयको पक्षमा उन्ले राम्रो काम गरेकी छन् । शिल्पा सुन्तलीको भूमिकामा उचित छन् । 

तपाईको रोजाइमा त अर्की नायिका हुनुहुन्थ्यो होइन ?

अकमकिदैं...हो पहिले मेरो रोजाइमा रेखा थापा हुनुहुन्थ्यो । संयोग कस्तो पर्यो भने रेखा जीे व्यस्त भएपछि मैंले अरु नायिका लिनु पर्ने स्थिति आयो । यस्तो भएपछि अरु नायिकामा जतिकै क्षमता शिल्पा पोखरेलमा छ भनेर उन्लाई लिएका हौं । शिल्पा अभिनित पहिलो फिल्म ‘लज्जा’ हेरेपछि पनि ‘हवल्दार सुन्तली’ मा उन्लाई लिन सजिलो भयो ।

नायिका रेखा थापा र निर्माता छविराज ओझा बिचको लडाइको मारमा पर्नु भएको त होइन ?

त्यसलाई त्यसरी नबुझौं । रेखा थापा र छवि ओझा ज्यूको कुरा मेरो फिल्म भन्दा धेरै परको हो । उहाँहरुको दाम्पत्य जिवन छुट्टिएपनि व्यावसायिक सम्बन्ध कायम रहनु पर्छ भन्ने मेरो शुभेच्छा छ । उहाँहरुको सम्बन्धले ‘हवल्दार सुन्तली’ मा स्थान लिएको छैन । म चपेटामा परेर शिल्पा पोखरेललाई लगेको होइन । रेखा थापा पछि अरु हिरोइन लिनु भन्दा शिल्पा पोखरेललाई लिनु पर्छ भन्ने मान्यत मेरो पनि हो । छवि ओझाको प्रोडक्सन भन्दा बाहिरबाट र अरुले जन्माएका हिरोइनलाई मैंले खेलाउन नचाहेको पनि हो । तर, छवि ओझाको दबाबमा परेर शिल्पालाई लिएको भने होइन् । 

रेखा थापा नहुने भएपछि अन्य चिनिएकी नायिका पनि त लिन सकिन्थ्यो होला नि ?

अरु कुन चाहिं नायिका लिने त ? मैंले चिनेको बुझेको नायिका रेखा थापा हो । नेपालमा अहिलेपनि एक नम्वरदेखि दश नम्वरसम्म नायिकामा रेखा थापा नै हुन् । दश नम्बर पछाडि चाहिं मैंले शिल्पा पोखरेललाई देख्छु । रेखा थापा पछिको मार्केट शिल्पा पोखरेलको हो । अरु नायिकालाई म चिन्दिंन । फिल्म पक्कै हेर्छु तर व्यक्तिगत चिनजान छैन । काम गर्ने तरिका पनि थाहा छैन । बजारमा नकारात्मक कुरा सुनिन्छ । उहाँहरुले समय नदिनु होला । हामी हाम्रो समयमा हिड्ने कलाकार लिन चाहान्छौं, आफ्नो समयमा हिड्ने कलाकार लिन चाहन्नौं । हाम्रो समय अनुसार हिड्ने भएकाले शिल्पालाई लिएका हौं । 

फिल्मको सबैभन्दा बलियो पक्ष चाहिं के हो ? 

विचार र विषय नै ‘हवल्दार सुन्तली’ को सबैभन्दा बलियो पक्ष हो । त्यसैले चैत २७ गते हलमा गएर फिल्म हेरिदिनुस् । अर्को कुरा छवि ओझाले आफ्नो फिल्मी कार्य कालमा दर्शकलाई मन पर्ने धेरै फिल्म दिनु भएको छ । छवि ओझाले निर्माण गर्ने फिल्म राम्रो हुन्छन् भन्ने दर्शकले बुझ्नु भएको छ । फिल्मका सबै कलाकारले राम्रो अभिनय गर्नु भएको छ । फिल्मको हरेक पक्ष उत्कृष्ट छ ।