चैत महिनको अन्तिम सातालाई छाडेर गन्ति गर्दा वर्ष २०७१ सालमा झण्डै ८० वटा नेपाली फिल्महरु प्रदर्शनमा आएका छन् । गत वर्षको तुलनामा यो वर्ष प्रदर्शनमा आएका फिल्मको संख्यामा झण्डै १० ले कमी आएको छ । यद्पी ८० फिल्महरु मध्ये वर्ष ०७१ सालमा १० फिल्मले पनि निर्मातालाई नाफा दिन सकेनन् । व्यापार जे जस्तो भएपनि वर्ष ०७१ सालमा नेपाली कलाकार भने चलिरहे, चर्चामा आइ नै रहे । तर, फिल्मको सुखद व्यापारिक पक्षको महसुश भने एकाध कलाकारले मात्रै गर्न सके । 

नायिका रेखा थापा अभिनित तीन फिल्महरु ०७१ सालमा प्रदर्शन भए ‘दमदार’, ‘हिम्मतवाली’ र ‘तथास्तु’ । फिल्म ‘तथास्तु’ ले सोचे अनुरुपको व्यापार नगरे तापनि आफ्नै ब्यानरबाट निर्माण भएको फिल्म ‘हिम्मतवाली’ ले भने रेखालाई केही प्रतिशत मुनाफा समेत दियो । फूलपातीमा प्रदर्शन भएको रेखाको ‘हिम्मतवाली’ वर्ष ०७१ सालको सुपरहिट मध्येको एक फिल्ममा पर्न आउँछ । फिल्म ‘दमदार’ मा रेखाको अतिथि भूमिका थियो । ‘हिम्मतवाली’ हिरो सुदर्शन गौतमसँगको प्रचारात्मक प्रेम प्रसंग, सामाजिक घटनासँगको संलग्नता र अन्य कारणले नायिका, निर्माता एवं निर्देशक रेखा थापा वर्ष ०७१ सालमा चर्चामा आइन् । 

०७१ सालको पहिलो महिना बैशाखमा प्रेमिका सपना भण्डरी सँग बिहे गरेर लाम लाइटमा आएका नायक आर्यन सिग्देल अभिनित यो वर्ष झण्डै आधा दर्जन फिल्महरु प्रदर्शनमा आए । प्रदर्शनमा आएका मध्ये आर्यनका जम्मा दुई वटा फिल्म ‘नोभेम्वर रेन’ र ‘लज्जा’ ले मात्रै लगानी सुरक्षित गर्ने व्यापार गर्न सके । आर्यन अभिनित बाँकी फिल्महरु ‘नाइके’, ‘अलबिदा’ र ‘माला’ ले निराशजनक व्यापार गरे भने फिल्म ‘पुर्नजन्म’ ले लगानीको झण्डै पचास प्रतिशत रकम निर्मातालाई फिर्ता गर्न सफल भयो ।  बिहे, व्यस्तता र फिल्म प्रदर्शनका हिसाबले नायक आर्यन सिग्देलले वर्ष ०७१ सालमा अरु नायकालाई पछि पारे ।

नायिका तर्फ प्रियंका कार्कीको वर्ष ०७१ सालमा सर्वाधिक फिल्महरु प्रदर्शनमा आए । तर, प्रदर्शनमा आएका अधिकाशं फिल्मबाट प्रियंकाले व्यावसायिक सफलताको महसुश गर्न सकिनन् । प्रियंका अभिनित ‘आवरण’, ‘पुन्टे परेड’ (अतिथि भूमिका), ‘मेरो वेस्ट फ्रेन्ड’, ‘सुन्तली’, ‘माला’ र ‘षडङ्ग’ जस्ता फिल्मले व्यावसायिक असफलता बेहोरे । यद्पी फिल्म ‘सुन्तली’ र ‘माला’ मा प्रियंकाले गरेको अभिनयको तारिफ गरियो, भयो । ०७१ को बैशाखमा प्रदर्शनमा आएको फिल्म ‘नाई नभन्नू ल २’ मात्रै प्रियंकाको करिअरकै व्यापारिक ब्लकबस्टर फिल्म हो । ‘नाई नभन्नू ल २’ को सिक्वेलमा पनि प्रियंकाको अभिनय रहेको छ, चैत २७ गते देखि प्रदर्शनमा आउने यो फिल्म प्रतिक्षित छ । आधा दर्जन फिल्म प्रदर्शनमा आएर एकले पनि व्यापारिक सफलता हाँसिल गर्न नसकेपछि प्रियंकाको वर्ष ०७१ साल अनलक्की देखियो । 

वर्ष ०७१ सालमा नायक जिवन लुईटेल पनि ‘अनलक्की’ देखिए । जिवन अभिनित मात्र तीन वटा फिल्महरु प्रदर्शनमा आए । प्रदर्शनमा आएका जिवनका ‘सिसा’ र ‘ठूली’ फिल्म ‘कोहिनूर’ को चेपुवामा परे भने ‘भूल भुलैया’ ले निर्माताको पुरै रकम असुल गर्न सकेन ।

नायिका नम्रता श्रेष्ठ अभिनित फिल्म ‘नोभेम्वर रेन’ व्यापारिक रुपमा सफल भएपनि नम्रताका दुई फिल्महरु ‘सम्बोधन’ र ‘सोल सिस्टर्स’ फिल्मी भाषामा भन्नुपर्दा ‘वास आउट’ भए । आफ्नै निर्माण एवं शिर्ष भूमिका रहेको नम्रताको ‘सोस सिस्टर्स’ कतिपय हलबाट पहिलो शो मै उत्रियो ।

बरु भुवन केसी पुत्र अनमोल केसी वर्ष ०७१ सालमा भाग्यमानी देखिए । अनमोलकै कारण फिल्म ‘जेरी’ हेर्न युवा दर्शकको हलमा घुँइचो लाग्यो । पहिलो फिल्म ‘होस्टेल’ र दोश्रो फिल्म ‘जेरी’ पनि हिट भएपछि अनमोललाई पिताको बिंडो थाम्ने अर्थात् भविष्यको स्टार नाययको रुपमा लिइएको छ । अनमोलकै उमेरका हिरो संयम पुरीको भने ०७१ सालमा प्रदर्शनमा आएका दुई वटै फिल्महरु ‘पुन्टे परेड’ र ‘आभाष’ व्यापारिक रुपमा अफसल हुन गए । ‘सायद’ चलेपछि चिनिएका संयमका यी दुई वटै फिल्ममा शिर्ष भूमिका थियो ।

वर्ष ०७१ सालमा नायिका निशा अधिकारीका ‘मुखौटा’, ‘मेरो भ्यालेन टाइन’, ‘आभाष’, ‘मिसन पैसा २’ र ‘भीमदत्त’ जस्ता फिल्महरु व्यापारिक रुपमा असफल भए । तर, क्रिकेटर शरद भेषवाकर सँगको प्रेम चक्कर र पत्रकारको ग्रेडिङ गर्दै आफ्नो फेसबुकमा स्टाटस पोस्ट गरेपछि निशा यो साल चर्चा र आलोचनाको पत्र बनिन् । ०७१ सालमा नायिका केकी अधिकारीका ४ फिल्महरु प्रदर्शनमा आए ।  तर, केकी अभिनित चार वटै फिल्मकोे व्यापार गतिलो हुन सकेन । ‘मेरो बेस्ट फ्रेन्ड’, ‘श्री ५ अम्बरे’ र ‘माइ प्रसिम’ जस्ता केकीका फिल्महरु वर्ष ०७१ मा असफल भए भने यसै वर्ष प्रदर्शनमा आएको फिल्म ‘पुर्नजन्म’ ले लगानीको पचास प्रतिशत जति रकम फिर्ता गरिदियो । २ हजार ७१ सालमा नायिका ऋचा शर्मा अभिनित एक मात्र फिल्म ‘टलकजंग भर्सेस टुल्के’ प्रदर्शनमा आयो । फिल्म ‘उत्सब’ उन्को अतिथि भूमिका थियो । ‘टलकजंग भर्सेस टुल्के’ को व्यापार उत्साहप्रद नभएपछि ऋचा स्वतः छायाँमा परिन् । बरु निर्देशक निश्चल बस्नेत सँगको प्रेम सम्बन्धका कारण ऋचा चर्चामा आइन् । गत वर्ष प्रदर्शनमा आएको फिल्म ‘झोला’ बाट एकाएक चर्चामा आएकी नायिका गरिमा पन्तको चर्चा यो वर्ष भएन भन्दा पनि हुन्छ । गरिमाका दुवै फिल्महरु ‘ठूली’ र ‘रङ्ग बैजनी’ व्यापारिक अफलताको लिस्टमा पर्न आए । नायिका सुमिना घिमिरेका पनि २०७१ सालमा प्रदर्शनमा आएजति सबै फिल्महरु असफल भए । यसै वर्ष बिहे गरेकी सुमिनाले फिल्म नै नखेल्ने निर्णय लिएकी छन् । नायिका निता ढुङ्गाानाको एकमात्र फिल्म ‘भूल भुलैया’ वर्ष ०७१ मा प्रदर्शनमा आयो । निताको यो फिल्मले सुखद् सुरुवाती व्यापार गर्यो तर लगानी भने उठाउन सकेन । 

नायक सौगात मल्ल अभिनित ‘मुखौटा’, ‘श्री ५ अम्बरे’ र ‘षडङ्ग’ जस्ता फिल्महरुले वर्ष ०७१ मा व्यावसायिक असफलता बेहोरे । तर, यी सबै असफल फिल्महरुमा निभाएको भूमिकाबाट सौगातले प्रशंसा पाउन सफल भए । कलाकार दयाहाङ राईको फिल्म ‘कवड्डी’ सफल भएपनि ‘नागबेली’ र ‘सम्बोधन’ जस्ता फिल्मले व्यापारिक निराशा बेहोरे । यद्पी दयाहाङ वर्ष भरी नै फिल्मको छायाँकनमा व्यस्त रहे । पहिलो निर्माण रहेको ‘बिर्खेलाई चिन्छस्’ बाट लगानी उठाएपनि नायक सुवास थापा अभिनित अरु फिल्म सफल हुन सकेनन् । 

एक समयका चकलेटी स्टार दीलिप रायमाझीका पनि वर्ष ०७१ मा ‘विधवा’ र ‘लोग्ने मान्छे’ लगायत फिल्महरु प्रदर्शनमा आए । यी फिल्मको प्रदर्शनले दीलिपको खस्केको क्रेज माथि उठ्न सकेन । महानायकको रुपमा परिचित राजेश हमाल फिल्म भन्दा पनि प्रेमिका मधु भट्टराईसँगको बिहेका कारण वर्ष ०७१ मा चर्चामा रहे । यो सालमा नायिका झरना थापा अभिनित कुनै पनि फिल्म प्रदर्शनमा आएनन् । दुवै हात गुमाएका सुदर्शन गौतम र मोडल शिल्पा पोखरेले वर्ष ०७१ मा नव नायक नव नायिकाको रुपमा चर्चा भयो । रेखा फिल्मस्को ‘हिम्मतवाली’ र छविराज प्रोडक्सनको ‘लज्जा’ बाट क्रमशः सुदर्शन र शिल्पाले रजतपटमा डेव्यु गरेका हुन् ।